نوفيلا أقدار شيدت بالماضي
الكاتبة زينب سعيد القاضي
-الحمد لله على كل حال.
نظرت الممرضة حولها بتوجس وقالت:
-طيب يلا عشان أعمل ليكي إذن الخروج عشان تمشي.
أومأت بايجاب وردت:
-حاضر بس أمانة عليكِ تطمنيني أن ابني اتغسل واندفن.
أومأت بإيجاب وردت:
-حاضر يا حبيبتي بإذن الله أنا هشوف واحدة صاحبتي توصلك لغاية البيت كمان غصب عني مش هعرف اجي معاكي.
ردت بوهن:
-يبقى كتر خيرك.
هتفت الممرضة بتلهف:
-عايزة رقم وتليفونك وعنوانك يا حبيبتي عشان أهل الطفل.
أومأت بتفهم:
-حاضر.
قامت بمساندتها حتى وصلت إلى إحدى صديقاتها كانت تنتظرهم في الخارج.
هتفت سامية برجاء:
-خدي بالك منها يا عفاف ووصليها لغاية بيتها وينوبك الثواب تعملي ليها لقمة تأكلها.
اعترضت حنين بضعف:
-لأ لأ مفيش داعي تتعب نفسها هي توصلني وخلاص.
رمقتها سامية بعتاب وقالت:
-بطلي هبل وأسمعي الكلام ورق خروجك خلص بالسلامة يا حبيبتي هخلص شغلي وهجيلك بإذن الله.
تبسمت بضعف وقالت:
-تسلمي يا رب.
تحركت حنين بضعف، وإلى جوارها عفاف تحمل الرضيع بين أحضانها بحنان، أوقفت سيارة أجرة، وصعدت أولًا وتبعتها عفاف وهي تحمل الرضيع بين أحضانها
يُتبع….
الفصل الثالث
«طفلي»
بعد أن اطمئنت عليها هي والطفل وغادروا أمانين بسلام، أخرجت هاتفها من جيبها والورقة المطوية، وقامت بطلب الرقم بيد مرتعشة وانتظرت حتى سماع الرد:
-ألو أيوه يا أستاذ أنا سامية الممرضة.
رد الآخر:
-إيه الأخبار؟
ردت بصوت مرتعش:
-الحالة توفيت والطفل اتولد عايش وبعدين مات.
الرجل:
-وزوجها؟!
أجابت بهدوء:
-الحالة حرجة.
الرجل:
-تمام إحنا جايين ناخدها هي والواد ندفنهم.
سامية بصدمة:
-إزاي؟ لأ طبعًا مينفعش لازم الأهل اللي يستلموهم.
رد الرجل بغلظة:
-المرحومة تبقى بت عمي.
سامية بصدمة:
-بنت عمك؟!
رد بنفاذ صبر:
-أيوه عندك مانع ولا إيه؟!
ردت بلهفة:
-ها لأ لأ طيب زوجها هيفضل لوحده؟
أجابها ببرودٍ:
-أهله يجوا يشيلوا شيلتهم هما بالسلامة.
أغلق الهاتف في وجهها وسط صدمتها:
-لأ حول ولا قوة إلا بالله العلي العظيم بقى في أهل يعملوا في بنتهم كده؟! هو الدم بقى مياه يا ناس؟! الحمد لله أن ربنا ألهمني أنقذ الولد الغلبان ده حسبي الله ونعم الوكيل فيكم، وربنا يقوم أبوك بالسلامة يا ابني عشانك.
