نوفيلا أقدار شيدت بالماضي
الكاتبة زينب سعيد القاضي
-ليه مقولتيش إنك حامل ؟ كان كل حاجة هتتغير وقتها.
تبسمت ساخرة وقالت:
-كنت هترجع ليا عشان ابنك؟ أهو ابنك كمان راح يمكن الحسنة الوحيدة اللي حصلت أن ابني اتنسب لأبوه واتدفن على أيد أهله أمشي يا حسان خد ابنك وأمشي مش عايز أشوف وشك تاني.
تجاهل حديثها وهتف بنبرةٍ هادئة:
–أنا همشي الوقتِ عشان أسيبك تهدي لكن هرجع ليكي تاني أشوف وشك بخير.
غادر الشقة ورضيعه بين أحضانه، بينما تهاوت حنين فوق الأريكة بانهيار شديد، وجلست جوارها سامية تحاول تهدئتها…
٭٭٭٭٭
منذ أن أستقل السيارة برفقة والديه أعطى إلى والدته الرضيع وظل تائهًا في ملكوته.
بعد مرور ساعة كانوا قد وصلوا إلى الشقة الخاصة، وها هو يجلس مثقل بالهموم وسط حيرة والديه لما حل به.
تسأل والده بقلق:
-خير يا ابني حصل حاجة وإنتَ بتجيب الولد؟ وليه مروحناش نعمله تحليل DNA عشان نطمئن.
أجاب بشرودٍ:
-ابني يا بابا اطمئن.
قطب والده جبينه بحيرة وتسأل:
-طيب وهنعمل إيه في الولد اللي اتدفن ده مكتوب على اسمك؟!
تبسم بمرارة وقال:
-ما هو ابني فعلاً.
أتسعت عين والديه بصدمة، وسارع والده بالقول:
-ابنك إزاي يا ابني؟ ما تفهمنا في إيه الله يرضى عنك.
أطلق زفيرًا حادٍ وسرد لهم كل شيء، وما أن أنهى حديثه توجه إلى والده بنظرة معاتبة وقال:
-طلقتها وسبتها وهي حامل في ابني يا بابا، ابني أتولد واتدفن وأنا معرفش حاجة عنه، ورغم ده كله وكل اللي عملته فيها كانت هي السبب بعد ربنا إن ابني التاني لسه عايش.
هتفت والدته بحزن:
-لأ حول ولا قوة إلا بالله العلي العظيم اهدي يا ابني وصلي على النبي.
ردد بهدوء:
-عليه أفضل الصلاة والسلام.
نهض والده فجأة وقال:
-يلا بينا.
نظر حسان إلى والدته بحيرة وقال:
-يلا بينا على فين؟
أجابه بحزم:
-هنروح نجيب المأذون وهنطلع على شقة طليقتك هتبات الليلة على ذمتك.
أتسعت عينيه مرددًا بعدم استيعاب:
-إزاي ؟ أكيد طبعًا مش هتوافق ترجع ليا بعد ده كله.
رد بحزم:
-أنا إللي خليتك تطلقها، وبعون الله أنا اللي هخليك ترجعها.
٭٭٭٭٭
في شقة حنين، لم تستطع سامية المغادرة وتركها بتلك الحالة بل ظلت برفقتها في غرفتها تواسيها، على فراق الصغير، وعلى صدمتها الأخرى أن رضيع يكون ابن زوجها السابق، وأثناء جلستهم تلك رن جرس الباب، نهضت سامية واتجهت إلى الباب وفتحته، وهنا كانت الصدمة فالطارق لم يكن سوى حسان ووالديه ورجل يظهر عليه أنه مأذون، وبرفقتهم رجل أخر.
