نوفيلا أقدار شيدت بالماضي
الكاتبة زينب سعيد القاضي
-هو لا مؤاخذة يا بنتي زوجك فين وأهلك؟
أجابتها بانكسار:
-والدي ووالدتي متوفين وأنا مطلقة.
عضت الأخرى شفتيها بحرج وقالت:
-حقك عليا يا حبيبتي مش قصدي والله أقلب عليكي المواجع.
تبسمت بضعف واسترسلت بنبرة هادئة:
-مفيش حاجة يا حبيبتي ولا يهمك.
نهضت عفاف بحماس:
-بصي بقى خليكي مرتاحة وحاولي ترضعي الولد على ما أجهز ليكي لقمة خفيفة هو المطبخ منين؟
حركت رأسها بإيجاب، وأشارت لها على المكان:
-الطرقة اللي هناك دي.
تحركت عفاف بخفة تجاه المطبخ، بينما نظرت حنين تجاه الرضيع وطالعته بإشفاق وضمته إلى أحضانها قبل أن ترفقه إلى صدرها وهي تقبل رأسه بحنان وتمتم بمرارة:
-ربنا يرحمك يا ابني ويصبر قلبي، ويعوضني بيك يا ابني ويجعلني عوض ليك.
٭٭٭٭٭
في المستشفى وصل الرجال وكانت سامية تقف في انتظارهم، استطاعوا إخراج جثة الأم بسهولة لصلة القرابة، بينما الطفل لم يستطيعوا إخراجه فيجب أن يتم استخراج شهادة ميلاد ووفاة له ولا يتم استخراج شهادة الميلاد إلا من خلال عائلة الأب.
وقف الرجل برفقة سامية ووضع يده في جيبة وأخرج حفنة من الأموال:
-اتفضلي.
ردت بنفي:
-لأ لأ شكرًا مش هاخد حاجة.
تعجب الآخر ورفع حاجبه باستنكار:
-نعم؟ مش هتاخدي حاجة ليه مش ده اتفاقنا وإنتِ نفذتي المطلوب منك وأنا راجل مبرجعش في كلمتي.
تنهدت بنفاذ صبر وقالت:
-أنا معملتش غير شغلي إنتَ من أهل الحالة فطبيعي أبلغك باللي حصل.
وضعت يدها في جيبها وأخرجت المائتي جنيه ومدت يدها إليه:
-أتفضل.
تبسم باستخفاف وقال:
-وه وه وه وه لا والله إنتِ مجنونة ولا بعقلك يا ست إنتِ بتديني فلوس؟
أجابت باختصار:
-دي فلوسك أنا مش عايزاها.
وضعت في يده وفرت هاربة سريعًا من أمامه، اقترب منه أحد رجاله وتسأل بحيرة:
-هو في إيه يا كبير؟
التفتت إليه وهتف بشرودٍ:
-مش عارف بس أنا مش مرتاح للست دي.
ابتسم الأخر بسخرية وقال:
-هتعمل إيه يعني يا كبير؟ سيبك منها وخلينا ناخد الجثة عشان ندفها كان بودي ناخد الواد كمان ونوديه ليهم متكفن.
انتبه الأخر وتحدث بابتسامة ماكرة:
-مش هتفرق نوديه ليه بكفنه ولا هو اللي يجي يستلمه بكفنه ويا سلام بقى لو المحروس ربنا ياخده ويستلم بدل الجثة أتنين ويمكن هو كمان يطب ساكت يبقى خلصنا منهم دفعة واحدة يلا بينا خلينا نرجع على البلد.
