رواية ظلمات لا تنسى
الكاتبة زينب سعيد القاضي
🔥🔥🔥
فتحت باب الغرفة وجدتها مفترشة سجادة الصلاة وتضع وجهها بين كفيها، أغلقت باب الغرفة وجلست أمامها وتحدثت بهدوء:
-عاملة إيه يا وصال ؟
رفعت “وصال” رأسها وظهرت وجنتيها الحمراء التي تختلط بفعل دموعها ابتلعت ريقها بمرارة وأجابت:
-الحمد لله.
ربتت “وجدان ” علي ظهرها بمؤازرة:
-معلش يا حبيبتي ألف سلامة عليكي.
أومأت برضا:
-الحمد لله.
نظرت لها وجدان بحذر قبل أن تدارك مستفهمة:
-هو إنتِ مش هتقولي لمازن عشان تشوفي رأيه؟
ردت بهدوء :
-أكيد طبعًا هقوله عشان يبقي عارف لكن معتقدش ده إنه هيفكر يأجل الفرح أصلاً ده كان مستعجل .
تبسمت وجدان متهكمة :
-يأجل الفرح ؟ إنتِ طيبة أوى يا حبيبتي.
رمقتها الآخري بحيرة وتسألت:
-قصدك إيه مش فاهمة ؟
ردت ببساطة :
-قصدي إنه أكيد هيفشكل الجوازة.
اتسعت عيناها بصدمة وتساءلت بعدم تصديق :
-إنتِ بتقولي إيه يا وجدان ؟ مازن يفركش الجوازة ؟ لأ طبعًا أنا ومازن بنحب بعض.
اشتعلت نيران الغضب داخل قلب الأخرى وتحدثت بحدة مفتعلة:
-يا دي الحب كل حاجة بالنسبة ليكِ الحب؟ أفهمي بقي يا وصال يا حبيبتي مازن إستحالة يوافق يكمل معاكِ وحتي لو وافق مش هيتجوزك غير بعد ما تخفي تمامًا كمان.
حركت “وصال” رأسها نافية وهتفت بإصرار:
-لأ طبعًا أنا واثقة في مازن وحبنا كمان هيفضل جنبى لغاية ما أتعالج بإذن الله حتى لو متعالجتش يكفي أني هقضي آخر أيامي معاه.
رمقتها “وجدان” بتحدي:
– طيب إحنا فيها كلميه وقولي ليه إيه رأيك؟ ولا تكلميه ليه هو مش نازل أجازة بكره خلاص؟
أومأت “وصال” بإيجاب:
-أيوة.
تبسمت وجدان بمغزي:
-يبقى اول حاجة هيعملها هيجي يزورك أتكملي معاه وشوفي رد فعله وقتها يلا هسيبك أنا أروح أتغدى وفكري في كلامي كويس عشان مترجعيش تنصدمي أنا أختك على فكرة محدش هيخاف عليكِ زي.
نهضت وجدان وغادرة الغرفة تاركة وصال غارقة في أفكارها.
بعد مرور نصف ساعة دلفت وفاء وهي تحمل صينية مرتص فوقها كوب من الحليب وعدة سندوتشات، نهضت “وصال” واخذتهم منها بعتاب :
-تعبتي نفسك ليه بس يا ماما.
رمقتها والدتها بعتاب وقالت :
-تعب إيه بس يا بنتي تعبك راحة .
تبسمت وصال بحب :
-طيب ممكن أفهم حضرتك زعلانة ليه ؟ أنا هتعالج بس مش بالكيماوي.
