رواية ظلمات لا تنسى
الكاتبة زينب سعيد القاضي
تبسمت “وفاء” بحزن وأكملت بمغزي:
-بس الكانسر مش زيه زي أي مرض يا دكتور حضرتك بطمني وخلاص.
حرك رأسه بيأس ورد بعملية:
-مممم هو الطبيعي أني أطمنك بس نتكلم بالعقل الكانسر فعلاً زي أي مرض مجتمعين في حاجة واحدة أنهم بيدخلوا جسم الانسان يدمروه سواء سكر سواء ضغط أو غيره هو أه اصعبهم واشرسهم ويمكن علاجه صعب سواء العملية أو الكيماوي أو حتى العلاج بالإشعاع بس هو في النهاية مرض ولازم نبدأ معالجة بحذر وحايطة ونتقبله يا ست الكل أما بقي المرض جه منين هرجع أقولك إنه زي أي مرض دخل الجسم ممكن يكون بسبب وراثي وممكن خلل چيني وممكن من غير سبب خالص كمان ومن هنا بقي السؤال المهم كان فيه في العائلة أي حالة كانسر ؟
حركت راسها بنفي وردت:
-لأ يا دكتور.
صمتت قليلاً وأكملت بحذر:
-بس هي ليها توأم ممكن تكون مصابة بكانسر هي كمان ؟
تحدث بعملية:
-لأ طبعًا مش شرط إلا إذا كان الكانسر ناتج عن خلل جيني وده أنا مستبعدة جدًا لأن الورم كان هيظهر في مرحلة الطفولة.
توجه بنظراته إلى “وصال” واستطرد بإبانة:
-إحنا هنبدأ الأول جلسات الكيماوي وبه…
“بس أنا مش هاخد كيماوي يا دكتور”
جملة حاسمة ألقتها علي مسامعه بجدية تامة، ألتفت لها بحيرة وتسأل:
-مش هتاخدي كيماوي إزاي مش فاهم؟
ردت باختصار:
-الكيماوي لأ أنا معنديش مشكلة مع المرض راضية الحمد لله ولو حتي مليش عمر لسه وهموت يبقى أموت وأنا على أرض صلبة مش وأنا شايفة نظرات الحزن والشفقة من أقرب الناس ليا.
تحدث مراوغًا فقد فهم ما تعنيه جيدًا:
-أنا فاهم حضرتك عايزه توصلي لايه لكن أفهميني لو سمحتِ الكيماوي ده مرحلة من العلاج مقدرش أتخطاها.
توجه بحديثه إلى وائل ووالدته وتحدث بلطف:
-ممكن تسبوني شوية مع أنسة وصال؟
تبادلا النظرات وأومأ وائل بإيجاب وهو يساعد والدته أن تنهض:
-تمام يا دكتور.
استدار إلي شقيقته بحنو:
-هستناكِ بره يا حبيبتي.
تبسمت بهدوء:
تمام…
يتبع……..
الفصل الثالث
انتظر” يونس” غلق الباب خلفهم وصب اهتمامه وتركيزه علي “وصال” .
تفهمت نظراته وأجابت بهدوء:
-فاهمة حضرتك عايزة تقول إيه كويس يا دكتور بس أنا مش هقدر اخد الكيماوي مش بس عشان هتتعب منه لأ ده كمان عشان إلي هيحصلي بعده وأهمها شعري هيقع وأنا مش هستحمل أشوف شعري بيقع مش هستحمل نظرات الشفقة من حد غير كمان فرحي قريب مش هستحمل نظرات النفور من جوزي غير كمان أنا عايزة أبقي أم والكيماوي يحتاج وقت عشان يخرج من جسمي أنا عايزة أفضل زي ما أنا حتى لو هموت وأنا كده بالنسبة ليا أموت بدل البهدلة دي أموت وأنا زي ما أنا.
