رواية ظلمات لا تنسى
الكاتبة زينب سعيد القاضي
حاول وائل التحدث معتذرًا:
-أنا أسف يا دكتور وصال متقصدش.
تبسم يونس بعملية :
-مفيش داعي تعتذر أصلاً محصلش حاجه أنا بس بجاوب على أسئلتها.
اتجه بنظراته لها وتسأل مستفسرًا:
-حضرتك قررتي إيه؟ هتروحي ؟ ولا هتفضلي ؟ عشان حضرتك كده هتضيعي وقتي وتاخدي من وقت المرضي إلي بره .
تنهدت بضيق وردت:
-أكيد مش بعد السفر والبهدلة هرجع علي الفاضي.
اتسعت ابتسامته وغمغم موضحًا:
-هايل جدًا الوقتِ بقي عايز أفهم بداية الاعراض كانت إمتي مش بداية زيادة الأعراض.
قطبت جبينها بحيرة وتسألت:
-مش فاهمة ؟
استرسل باستفاضة:
-يعني إمتي كان بيجي ليكي صداع جامد ويقعد نص ساعة مثلاً ويمشي كان من إمتي ؟ وكمان كان يخف لوحده ولا بالمسكنات والأهم أيه الأعراض الي تصاحبه ركزي معايا معلش عايز معلومات دقيقة علي قد ما تقدري.
عادت بذاكرتها إلى الخلف وأجابت بتذكر:
-يعني من حوالي ست شهور كان صداع جامد ومعاه شوشرة في الرؤية وأحيانًا غثيان.
دون ما قالته وتدارك مستفهمًا:
– الأعراض زادت إمتي ؟ والدكاترة اللي قبل كده تشخيصهم أيه؟
أجابت بهدوء:
-الأعراض زادت من شهرين وروحت لدكاترة كتير في منهم قال أنيميا وفي قال إرهاق.
عاد بظهره إلى الخلف مستندًا على ظهر مقعده يحركه يمين ويسار وأكمل استفساراته باهتمام:
-طيب في نسيان فاكرة كل حاجة ولا بتنسى بسرعة ؟ الكلام مثلاً بتقدري تتكلمي بشكل متواصل؟ التركيز تقدري تركزي بشكل متواصل ولا بتفصلي وتنسي كل حاجة ؟
أومأت بالإيجاب:
-بنسى بسرعة فعلاً وبردوا أبقي بتكلم وفجأة أنسي كنت بقول أيه أو أقطع في كلامي ومش بقدر أركز فعلاً.
توقف بمقعده وبدأ يدون بعض أسامي الفحوصات والأشعة الخاصة بها وتحدث بعملية:
-حاليًا هنبدأ بالأشعة المقطعية للمخ الأشعة طلعت سليمة يبقي مؤشر كويس وكذلك كتبت مجموعة من التحاليل تعملها وبإذن الله خير.
كانت تراقب كل شئ من البداية بقلب أم يحترق داخلها ولكن بعد ما قاله الطبيب تيقنت أن مرض ابنتها بالكانسر من المحتمل أن يكون حقيقة فعلياً مما جعلها تنظر إلي الطبيب وتتساءل بحذر:
-يعني يا دكتور ممكن ميكنش عندها ورم في المخ زي ما إنتَ شاكك؟
تبسم بهدوء وعقب قائلاً:
-وارد جداً يا حجة بس خلينا نطمئن الأشعة تقدروا تعملوها في المركز المقابل ليا وانتوا خارجين تقدروا تحجزوا وبكره الصبح تنوروني بإذن الله بعد ما تعمل الأشعة.
