رواية ظلمات لا تنسى
الكاتبة زينب سعيد القاضي
بهت وجهها من رده وهتفت والدتها على الفور:
-إستهدي بالله يا أبني هي متقصدش هي بس بتطمئن.
التفت لها وتحدث بلطف:
-يا ست الكل براحتها لو حابة تروح لدكتور تاني زي ما تحب أما حالتها خلاص الحمد لله قطعنا شوت كبير في العلاج ومعاد عمليتها اتحدد خلاص كمان أسبوع فهي مش حابة أنا أعمل العملية ده شئ يرجع لها بعد إذنكم قرروا وبلغوني.
وضع التقرير مكانه وغادر الغرفة، نظرت “وفاء” إلي ابنتها بعتاب:
-ليه بس كده يا بنتي ؟ الراجل شايف شغله بما يرضي الله مش كفاية وقفته جنبنا وفي ضهرنا ده فيه أدوية غالية علينا مستوردة كان بيجبها هو تبع شغله ومش بياخد مننا فلوس يبقي ده جزاته ؟ بدل ما نشكره ونقول كلمة حلوة ؟
أجابت بانفعال:
-ما هو مش بيعمل كده لله البيه عامل فيها الحبيب وعايز يتجوزني .
رمقتها والدتها بعدم تصديق وعقبت قائلة:
-بيحبك وعايز يتجوزك طيب ده يوم المني أهو ده الراجل اللي بجد بس مين قالك كده ؟
ردت بتلقائية:
-هو بس أنا وقفته عند حده.
أغمضت والدتها عيناها وفتحتها عدة مرات مرددة بعدم تصديق:
-قالك إنه بيحبك وعايز يتجوزك وجنابك وقفتيه عند حده؟ يعني لو عملتي العملية كنت قُلت شالوا مخك من مكانه وحطوا طبق سلطة لكن لسه معملتيش العملية ليه كده إيه عيبه ؟ وصال أوعي تكوني لسه بتحبي مازن أو بتفكري فيه يا بنتي؟ ده خلاص بقى جوز أختك يعني مفيش أمل يكون ليكِ في يوم من الأيام.
هزت رأسها نافية وعقبت بإيضاح:
-لأ طبعًا يا ماما مازن بقي بره حياتي من اللحظة إلي باعني فيها.
ضيقت الأخري عيناها وتسألت بحذر:
-طيب أنا كده فهمت كنتِ بتعمليه وحش ليه الوقتِ بقي ليه بتجري شكله عشان يكلمك بعد ما بعدتيه بنفسك ؟ وصال إنتِ حبتيه؟
تهربت من نظرات والدتها وأردفت بارتباك:
-حبيته إيه لا طبعًا يا ماما .
رمقتها والدتها بعدم تصديق:
-مممم تمام.
🔥🔥🔥
في شقة ” مازن ووجدان ” كانت تتحرك ذهابًا وإيابًا بعصبية شديدة بينما يجلس هو يقلب في قنوات التلفاز بملل وضيق يراقبها بنفاذ صبر:
-هتفضلي راحة جاية كده كتير؟
توقفت في مكانها وصاحت بانفعال:
-والمفروض أعمل إيه بعد اللي حضرتك قُلته ده ؟
قلب عينيه بملل وقال:
-وأنا قُلت إيه؟
ردت ساخرة:
-قُلت إيه ؟ جنابك هتسافر وتسبني وكمان كام شهر تبعت ليا أسافر معاك وقُلت ماشي لكن اللي مش ماشي بقي واستحالة أوافق عليه باقي كلامك يعني إيه هعيش مع والدتك تحت ؟ وكمان مصروفي هاخده منها هي؟
