رواية ظلمات لا تنسى
الكاتبة زينب سعيد القاضي
-كيونس إيه؟
ابتسم بحنو:
-يونس اللي حبك من غير ما يحس، واللي لما عرف الحقيقة خاف يقولها عشان ما يزودش عليكِ تعبك.
اتسعت عيناها قليلًا، ثم انسابت دمعة بطيئة:
-إنت بتحبني؟
لم يتردد، لم يلف، لم يهرب:
-آه يا وصال، بحبك. من يوم ما دخلتي العيادة وأنا حاسس إنك مش زي أي حد. بس سكت، استنيت، قلت لما تبقي كويسة لما ربنا يعديكي من المحنة دي المهم في اللي هيحصل دلوقتي.
قالت بنبرة أقوى قليلًا:
-هيحصل دلوقتي؟
ابتسم:
-دلوقتي نركز إنك تخفي، خطوة خطوة وبعدها لما تقفي على رجليك، هطلب إيدك رسمي قدام الدنيا كلها.
ضحكت بخفة رغم الألم:
-دكتور بيطلب إيد مريضته؟!
رفع حاجبه بمكر:
-مريضتي السابقة. دلوقتي إنتِ أعز إنسانة في حياتي، وده تشخيص نهائي.
ضحكت، ثم شهقت من الألم، فاقترب يونس سريعًا:
-على مهلك، ضحكك لسه ممنوع.
قالت بمشاكسة ضعيفة:
-أوامر دكتور ولا أوامر خطيب؟
ابتسم بعشق:
-الاتنين واحد.
دخلت الممرضة في تلك اللحظة، تنظر لهما بابتسامة خفيفة:
-الحمد لله على السلامة يا أستاذة وصال، الدكتور يونس تقريبًا كان هينهار لو ما فوقتيش.
احمر وجهه قليلًا:
-خلاص يا هدى، كفاية فضايح.
ضحكت وصال:
-سيبها تفضحك، أنا مبسوطة.
بعد أن خرجت الممرضة، عاد الصمت بينهما، لكنه كان صمتًا دافئًا. قالت وصال فجأة:
-يونس لو كنت ما فوقتش؟ وكنت موت؟!
هتف :
-ما تقوليهاش إنت فوقتي، وربنا إدانا فرصة جديدة وأنا وعد مني عمري ما أسيب إيدك.
ابتسمت، وأغمضت عينيها:
-طيب اقعد جنبي بس لو نمت، متسيبنيش.
تبسم برفق:
-نامي يا حبيبتي، وأنا هنا. وهفضل هنا العمر كله.
ومع انتظام أنفاسها، جلس يونس يراقبها، لأول مرة منذ أيام يشعر أن قلبه عاد للنبض، وأن الحياة، رغم قسوتها، قد ابتسمت له أخيرًا.
🔥🔥🔥
في الخارج….
كان يجلس وائل برفقة والدته، وتحدث بارتياح شديد:
-الحمد لله أنا قلبي كان هيقف لو حصل ليها حاجة.
أومأت بتأكيد:
-أيوه يا ابني مين سمعك الحمد لله.
هتف وائل بتردد:
-أنا ملاحظ إن دكتور يونس مهتم بوصال أوي.
تبسمت وقالت:
-لسه واخد بالك؟!
رد باختصار:
-من قبل عمليتها وأنا حاسس بكده.
أومأت بايجاب:
-عارف وياريت بجد يكون من نصيبها ويعوضها عن اللي شافته.
