اسكريبت مريض نفسي
الكاتبة زينب سعيد القاضي.
سامح:
وامبارح راح الچيم.
المدير بشرود:
شكل كلامك صح وهتنجح فعلاً فى علاجه.
سامح:
هيحصل عارف ليه يا دكتور؟!
المدير:
ليه؟!
سامح:
عشان هى قدرت تخليه يثق فيها وتديله الأمان إلى هو مفتقده.
المدير :
لما نشوف.
…..
عدت الأيام والشهور وعمر بدأ يتحسن فعلاً العلاج والخروج خلى نفسيته تتحسن ووضعه بقت أفضل كتير بقى يتكلم عن الأول ويتعامل طبيعي نوعًا بهدوء.
فى أحد الأيام بعد ما لعب رياضة وطلع اوضته أخد علاجه وفطر رنا دخلت الأوضة:
أخبارك أيه ؟!
عمر :
تمام.
رنا بتصحيح:
إسمها الحمد لله.
عمر بهدوء:
الحمد لله.
رنا بابتسامة:
شطور ندخل بقى في المهم إنتَ ملكش أصحاب؟!
آول ما قالت كده انتفض من مكانه:
بتسألى ليه؟!
رنا بثبات:
سؤال عادى لأن محدش بيزورك غير جدك بس جاوب على سؤالى ليك أصحاب ولا لا؟!
عمر بضيق:
ليا بس قطعت علاقتي بيهم.
رنا:
ليه ؟!
عمر مردش.
رنا :
عشان واحد غدر بيك ؟!
عمر بردوا مردش.
رنا:
طيب مبدئيًا العيب مش عليه العيب علي الخائنة إلي بصت لواحد غير جوزها وقتلت ولادها بدم بارد قبل ما يشوفوا النور.
عمر فضل ساكت تمامًا.
رنا بهدوء:
طيب أنا شايفك إنك ترجع تقابل أصحابك وتخرج من القوقعة دى.
عمر برفض:
لا.
رنا:
إنتَ أتحسنت خلاص وقريب أوى هتخرج من هنا لما تخرج ناوى تعمل أيه فى حياتك ؟!
عمر بشرود:
أخرج من هنا؟!
رنا بتأكيد:
أيوة هتخرج خلاص وقريب أوى كمان حاول ترجع تتعامل مع أصدقائك أكيد كلهم مش وحشين أرجع شغلك كمل حياتك وكل إلى خسرته هتقدر ترجعه ويبقى وضعك أحسن من الآول كمان.
عمر بشرود:
تفتكرى كل حاجة هترجع؟! ولادى إلى ماتوا من قبل ما يشوفوا النور هعوضهم؟!
رنا بهدوء:
ربنا إلى رزقك بيهم آول مرة وبإذن الله هيرزقك ويعوضك بغيرهم بس المرة دى إختار الإنسانة الصح إلى تصونك وتصون عرضك يلا هسيبك شوية فكر مع نفسك فى كلامى بعد إذنك.
…..
عدا يومين الوضع ماشي زى ما هو فى اليوم التالت جه جده يزوره بس مش لوحده معاه أربعة من أعز أصدقائه بناءً على طلب رنا إلى وقفت تتابع الموقف من بعيد، سلم عليهم بفتور بس شوية قدر يندمج معاهم.
الجد أستأذن وخرج من الاوضة وراح لرنا.
الجد:
طمنيني يا بنتى؟!
رنا بابتسامة:
هانت قريب أوى وهيخرج معاك من هنا.
الجد بأمل:
يارب يا بنتى.
…..
بعد مرور شهرين رنا كانت فى مكتب المدير بتتناقش معاه هو والدكاترة فى حالة عمر وإلى كل أجمع أنه أتحسن فعلاً ويقدر يخرج يمارس حياته الطبيعية وجه دورها أنها تبلغه بده.
