اسكريبت مريض نفسي
الكاتبة زينب سعيد القاضي.
مممم طيب بلاش السؤال دى مين حاولت تقتلك وقتلت ولادك؟! هو إنتَ كان عندك ولاد؟
عمر أنتفض بعصبيه ووقف، هي خافت وقامت وقفت بسرعة وتراجعت للوراء بخوف.
عمر قرب منها ورفع ايده عايز يخنقها مرة تانية بس مرة واحدة وقف وبدأ يلف حوالين نفسه ويكسر كل إلى فى الأوضة.
الممرضين دخلوا بسرعة.
الممرض بلهفة:
نربطه يا دكتور؟!
رنا برفض:
لا محدش يقرب منه.
الممرض الآخر بحيرة:
ده هيكسر الأوضة يا دكتور.
رنا بنفاذ صبر:
هو الوقتِ عنده بينفذ عن عصبيته خلوه يعمل ما بداله لغاية ما يهدأ تمامًا ويقعد لوحده.
الممرضين بصوا لبعض.
رنا:
خلونا نطلع بره.
الممرض بصدمة:
هنسيبه لوحده كده؟!
رنا بهدوء:
أيوة.
الممرض الآخر برفض:
يا دكتورة كده ممكن يأذي نفسه.
رنا :
بالعكس تمامًا طول ما إحنا واقفين قدامه ممكن يستفزنا لكن لو لوحده هينفذ غضبه ويقعد يلا على بره خرجوا التلاتة فعلاً وقفلوا الباب.
فى الداخل فضل يلف ويدور ويكسر كل حاجة لغاية ما بدأ يهدأ تمامًا وقعد على الأرض ودموعه بتسيل بصمت تام .
فى الخارج.
الممرض:
الصوت سكت.
رنا:
خليكم هنا هدخل أنا لو في حاجة هنادى ليكم.
الممرض:
حاضر يا دكتور.
فى الداخل فتحت الباب بحذر لقته قاعد على الأرض وبيبكى بصمت قفلت الباب وراءها ودخلت الأوضة وبدأت تنضفها وتلم المتكسر وهو بيراقبها بصمت.
مر ساعة كاملة كانت خلصت وهو قاعد زى ما هو، الباب خبط.
رنا:
أدخل.
دخل التمرجى معاه عربية الأكل:
الغداء بتاع المجنون.
رنا بانزعاج:
أيه المجنون دى؟!
التمرجى:
ما هو مجنون أمال بيعمل أيه هنا؟!
رنا بغيظ:
تصدق بالله أنا بقى عندى شك أنه هو السليم وإنتوا المجانين إسمه مريض سيب الأكل وأتفضل أطلع بره.
التمرجى مشي وهى راحت للأكل وبصت ليه بتقزز كان شوربة خضار وفراخ مسلوقة بس الريحة مش ألطف حاجة.
قعدت تتلفت حواليها لغاية ما لقيت شنطتها الضهر إلي خلعتها آول ما وصلت فى البلكونة راحت جبتها وفتحت السوسة وخرج كيس منه وبعدين راحت عند عمر وقعد على الأرض قصاده وفتحت الكيس بحماس:
بصي بقى ريحة الشوربة توحي أنها متتاكلش أسمحلى بقى أعزمك على الغداء معايا سندوتشات كبدة اسكندرانى مشطشة كده وسجق جيباها من علي عربية تحفة.
ظهر التقزز على وجهه وبث الناحية التانية.
رنا بضحك:
بهزر على فكرة مش بأكل من الشارع أطمئن أنا مش مجنونة أكل كبد كلاب وأقعد أهوهو أتفضل كل بسم الله.
