اسكريبت نور

ده ده طالع شبهك فعلًا.

شهاب:

يعني مش زعلانة؟

نور:

زعلانة بس مش ندمانة.

بصت لشهاب بنظرة كلها حب وتعب:

عارف؟ السنة اللي فاتت من يوم ما اتجوزنا وأنا بخاف بخاف أفرح زيادة بخاف الدنيا تاخد مني اللي اديتهولي.

شهاب:

وأنا كنت خايف أوجعك كل يوم.

نور:

بس إنت ما وجعتنيش إنت تعبتني بس.

ضحكوا الاتنين.

شهاب قرب وقال:

حقك عليا.

نور:

لا خليك جنبي بس.

الممرضة شالت الطفل شوية عشان تنظفه، نور بصت حواليها، حست بهدوء غريب.

نور:

شهاب.

شهاب:

نعم؟

نور:

فاكر أول مرة قلتلك إني خايفة الناس

تتكلم؟

شهاب:

فاكر.

نور:

الوقتي مش فارقلي حد ولا سن ولا كلام ولا لقب فارقلي بس إنك هنا.

شهاب عينيه دمعت:

وأنا عمري ما همشي.

نور ابتسمت بتعب:

بس خد بالك ده آخر عيل.

شهاب رفع حواجبه:

ليه بس؟

نور بصوت ضعيف لكن حازم:

عشان لو دخلت أوضة العمليات تاني مش هطلعك منها عايش.

شهاب ضحك وهو بيبص للبيبي:

خلاص نسمع كلام ماما.

نور غمضت عينيها، مسكة إيد شهاب، وهمست:

الحمد لله إني وافقت عليك.

شهاب بفرحة:

كان أحسن قرار اخدتيه في حياتك يا حبيبتي ربنا يخليكي ليا يارب العالمين ويبارك في ابننا يا غالية…

نور:

هنسميه محمد عشان كل ما ننادي اسمه نحمد ربنا على اللي وصلنا ليه.

شهاب:

موافق طبعًا.

تمت بحمد الله.