اسكريبت نور
الكاتبة زينب سعيد القاضي
نور سكتت تاني، وافتكرت مواقف كتير في الشغل، إزاي كان دايمًا يحترم رأيها، يسمع لها، وما يحاولش يقلل منها.
نور:
هو عمره ما حسسني إني أكبر منه ولا حاول يتباهى عليا بالعكس دايمًا بيقولي إنه بيتعلم مني.
فتحية:
أهو ده كلام يطمن الراجل اللي يعترف بقيمة الست اللي قدامه راجل فاهم.
نور:
بس بابا لو كان عايش كان هيوافق؟
فتحية اتنهدت، وعينيها لمعت بحزن خفيف:
أبوكي الله يرحمه كان دايمًا يقول الست اللي تفكر بعقلها قبل قلبها تكسب لو شاف في الراجل ده أمان ليكي كان وافق.
نور:
طب وإنتِ؟ إنتِ موافقة فعلًا؟ ولا بس عايزة تفرحي بيا؟
فتحية:
أنا عمري ما أفرح على حسابك موافقتي جاية من إحساسي كأم شايفة في عينيكي خوف مش رفض والفرق كبير.
نور بابتسامة باهتة:
يمكن أنا خايفة أكتر ما أنا رافضة.
فتحية:
الخوف طبيعي بس ما ينفعش نخليه هو اللي يسوق حياتنا قوليلي هو طلب يشوفنا رسمي؟
نور:
أيوه قال إنه هيجي يتقدم لو أنا موافقة.
فتحية:
وإنتِ قلتِ له إيه؟
نور:
قلت له محتاجة أفكر.
فتحية:
طيب فكري بس فكري بعقلك وقلبك سوا مش بلسان الناس.
نور قامت من مكانها، مشيت شوية في الأوضة، وبعدين وقفت عند الشباك الشارع تحت هادي، والليل ساكن، بس جواها دوشة قالت بحزن:
عارفة يا ماما أنا تعبت من الوحدة تعبت أرجع من الشغل وأدخل أوضتي وأقفل الباب بس خايفة أختار غلط.
فتحية قامت وقفت وراها:
الوحدة وحشة بس الجواز الغلط أوحش عشان كده ما تستعجليش بس كمان ما تقفليش الباب بإيدك.
نور لفت وبصت لأمها:
إنتِ شايفة إني لو رفضت هكون ظلمته؟
فتحية:
يمكن ويمكن تظلمي نفسك كمان بس القرار في الآخر قرارك إنتِ.
نور:
طب لو وافقت وطلع كلام الناس أكبر من طاقتي ومقدرش أستحمل؟ وقتها أعمل إيه؟!
فتحية:
يبقى نتعلم ما نسمعش اللي هيعيش على مزاج الناس عمره ما هيرتاح النهارده هيتكلموا عن فرق السن بكرة عن شغلك بعده عن لبسك مفيش آخر.
نور ضحكت ضحكة صغيرة:
إنتِ دايمًا بتكسبي النقاش.
فتحية بابتسامة:
مش بكسبه أنا بس شفت الدنيا قبلك وعشتها قبلك بشوية.
بعدين نور أخدت نفس عميق:
طيب هفكروبعدين أخلي ييجي نشوفه رسمي ونتكلم مش بوعدك بحاجة بس مش هرفض من غير ما أدي نفسي فرصة.
