اسكريبت نور
الكاتبة زينب سعيد القاضي
أنا آسف يا صاحبي حقك عليا.
شهاب:
لو سمحت مش هنتكلم تاني اللي بينا شغل وبس.
ناجي:
والله العظيم أنا كنت خايف عليك صدقني يا صاحبي.
شهاب:
ماشي يا ناجي بس دي تبقى آخر مرة تجيب سيرتها تاني سواء بالخير أو بالشر وقتها متلومش غير نفسك.
ناجي:
لا خلاص توبت إلى الله ربنا يعلم إني قولت الكلام ده عشانك إنت.
شهاب:
خلاص سماح.
ناجي:
ربنا يبارك فيك يا صاحبي.
……
في مكتب المدير….
بعت لنور وحكى ليها اللي حصل.
نور بصدمة:
حضرتك بتتكلم جد؟! ضرب صاحبه عشاني؟!
المدير:
أيوه أنا بلغتك لهدف إنه لو متقدم ليكي فعلاً زي ما قال أنصحك توافقي عليه .
نور:
أوافق عليه؟!
المدير:
أيوه لأنه راجل بجد ويستهالك وواضح أنه شاريكي أنا بنصحك كأب يا بنتي.
نور:
ربنا يقدم اللي فيه الخير.
المدير:
فكري كويس يا بنتي وعيشي حياتك السن مش مقياس أو وجه مقارنة السن مجرد رقم مش أكتر ولا بيقدم ولا بيأخر.
نور:
تمام يا فندم وشكرا لكلام حضرتك.
المدير:
أنا معملتش حاجة يا بنتي ربنا يبارك فيكي ويسعدك.
نور قامت وراحت مكتبها وعلى وشها ابتسامة صغيرة من اللي عمله شهاب عشان أول مرة تحس أن ليها ضهر وليها سند…
……
بعد مرور شهرين جه اليوم الموعود اللي قررت تتكلم فيه معاه عن مخاوفها….
وصلت الصبح مكتبها لقت الورد ولقته في انتظارها كالعادة .
شهاب:
صباح الورد.
نور:
صباح النور مستعد تسمع كلامي؟!
شهاب:
على أحر من الجمر.
نور:
لو وافقت تتجوزني جاهز تواجه الناس وإنت متجوز واحدة عانس أكبر منك بخمس سنين؟!
شهاب:
قبل ما أرد خليني أسألك سؤال واحد بس إنتِ شايفة نفسك إيه؟
نور:
شايفة نفسي ست تعبت، اشتغلت، شالت نفسها بنفسها، وعدى العمر وهي مستنية حد يشوفها بجد مش بس يشوف لقبها ولا سنها.
شهاب:
طب تعرفي أنا شايفك إيه؟ شايف واحدة ناضجة، فاهمة، قوية، ووشها لسه فيه روح بنت صغيرة بتفرح بالورد كل صباح، حتى لو بتداري ده.
نور:
الكلام سهل يا شهاب الناس بقى؟ اللي هيقول طمعان، واللي هيقول مجنونة، واللي هيقول دي عانس مسكت في شاب أصغر منها جاهز تسمع ده؟ جاهز تواجه أهلك؟ شغلك؟ صحابك؟
شهاب:
أنا واجهت نفسي الأول وسألتها إنت بتحب نور ولا لأ؟ ولما الإجابة كانت آه الباقي كله بقى تفاصيل.
