نوفيلا أنين لا يرى
الكاتبة زينب سعيد القاضي
نظرت إلى والدتها مرة أخرى، ومسحت دموعها بيدٍ مرتجفة، ثم جلست بجانبها، تمسك يدها بكلتا يديها.
همست، وكأنها تطمئن نفسها قبل أي أحد:
-سليم جاي.
لكن قلبها لم يهدأ وعيناها تحركتا تلقائيًا نحو باب غرفة الرعاية المركزة، حيث يرقد شقيقها.
❤️❤️❤️
في بيتٍ قديم يملؤه التوتر، كانت والدة محمود تجلس في منتصف الصالة، تلطم على صدرها وتنتحب بحرقة، وكأن قلبها يُنتزع من بين ضلوعها مع كل شهقة.
صرخت بصوتٍ مبحوح، والدموع لا تتوقف عن الانهمار:
-يا ضنايا يا ابني إيه اللي وداك في المصيبة دي؟!
كانت تهتز في مكانها، وكأنها فقدت القدرة على السيطرة على نفسها، بينما يديها تضربان على فخذيها في عجزٍ وألم.
على الجانب الآخر، كان زوجها يجلس متجهمًا، ملامحه قاسية، وعيناه تشتعلان غضبًا أكثر من الحزن ظل يراقبها للحظات، ثم قال بنفاد صبر:
-ما تهمدي بقى يا ولية؟!
التفتت إليه بصدمة، وعيناها متورمتان من البكاء:
-أهدي إزاي بس؟! ده ابني ابني يا راجل!
رد عليها بحدة:
-ابنك اللي جاب لنفسه المصيبة بإيده! محدش قاله يعمل اللي عمله!
شهقت بقوة، وكأن كلماته كانت طعنة جديدة:
-إنتَ قلبك حجر كده؟! مهما كان ده ابنك!
نهض من مكانه فجأة، وصوته ارتفع:
-وأنا أعمل إيه يعني؟! ده قاتل يا ست!
وضعت يدها على فمها بصدمة:
-لا! لا ابني ما يقتلش محمود عمره ما كان كده.
ضحك بسخرية مرة:
-ما هو اللي زيك اللي دلعه، وسابه يعمل اللي على مزاجه لحد ما بقى فاكر نفسه فوق القانون!
هزت رأسها بعنف:
-لا لا أكيد في حاجة غلط أكيد حد ورطه.
اقترب منها قليلًا، ونظر لها بحدة:
-محدش بيورط حد كل واحد بيشيل شيلته.
جلست على الأرض فجأة، وكأن ساقيها لم تعودا تحملانها، وبدأت تبكي بصوتٍ أعلى:
-أنا عايزة ابني عايزة أشوفه.
زفر بضيق، وأدار وجهه بعيدًا عنها، لكنه لم يخفِ القلق الذي بدأ يتسلل إلى عينيه رغم قسوته الظاهرة.
-لو البوليس مسكه مش هتعرفي تعملي له حاجة.
قالها بصوتٍ أخفض هذه المرة.
رفعت رأسها نحوه، والأمل يلمع وسط دموعها:
-يبقى نلاقيه قبلهم لازم نلاقيه.
نظر إليها للحظة، ثم أشاح بوجهه مرة أخرى، وكأن الفكرة نفسها ترعبه.
-ولو لقيته هتعملي إيه؟ هتخبيه؟!
