اسكريبت نور
الكاتبة زينب سعيد القاضي
قربت من المكتب وفتحت درج صغير، طلعت صورة قديمة. مسكتها وبصت لها:
أنا اللي اتعلمت أكون قوية .
افتكرت التجربة اللي عدت بيها، الوعود اللي مكملتش اللحظة اللي حست فيها إن الوقت سرق منها أحلام كتير: قال لي محتاج شريكة مش زوجة وبس بس يا ترى الكلام ده يكفي؟ أنا لا صغيرة أعيش بس بالمشاعر ولا كبيرة أتنازل عن حقي.
سكتت وبعدين قامت وقفت قدام المراية الصغيرة اللي معلقاها على جنب المكتب عدلت طرحتها وبصت في عينيها كويس وكملت كلام:
خمسة وتلاتين مش رقم يخوف بس المجتمع هو اللي مخوفني.
قعدت تفتكر نظرات الناس، الأسئلة اللي بتتكرر:
اتأخرتي ليه؟ مركزة في شغلك أكتر من اللازم؟ مفكرتيش تتنازلي شوية؟ وأتنازل عن إيه؟وعن نفسي؟ عن راحتي؟ وشهاب مش باين عليه واحد متهور عارف هو بيعمل إيه لا بلاش تبرري هو أصغر والفرق ده هيبان بعدين النهارده ممكن يقول مش فارق، بكرة؟ بعد خمس سنين؟
افتكرت نفسها وهي عندها تلاتين قد إيه كانت مختلفة النضج اللي جه معاها مكنش سهل:
هو لسه قدامه تجربة الحياة.
مدت إيدها ومسكت موبايلها، فتحته، قفلتُه، كأنها عايزة تكلم حد وتراجعت.
نور:
لو وافقت هبقى أنانية؟ ولو رفضت هبقى جبانة؟
ضحكة خافتة طلعت منها:
ولا عمري عرفت أكون حاجة غير مسؤولة.
بصت على الساعة، الوقت عدى من غير ما تحس قامت لمت شوية أوراق عشان تلهي نفسها، بس عقلها كان بعيد.
نور:
يمكن رفضت عشان أحمي نفسي مش عشان مش عايزاه أنا مش عايزة أعلق نفسي بحاجة وهم.
رجعت قعدت، خدت نفس عميق:
هو قال هيديني وقت وأنا فعلًا محتاجة وقت.
رفعت راسها بثبات:
بس المرة دي هفكر من غير خوف لا من سني ولا من كلام الناس اللي فيه الخير هيبان ولو ما كانش نصيب يبقى هو كده خير.
…….
في المساء….
نور خارجة من الشركة في نفس الوقت اللي شهاب خارج فيه واتقابلوا على الباب.
شهاب:
محتاجة حاجة يا أستاذة؟
نور باقتضاب:
شكرًا مش عايزة.
شهاب:
ممكن طلب صغير؟! أو رجاء.
نور:
أفندم عايز تقول إيه؟! مش إحنا قفلنا الموضوع الصبح وقلت هتديني وقتي؟!
شهاب:
أنا مش عايز أقفله أنا عايزك تفكري .
نور:
إنت عارف أنا عندي كام سنة؟!
شهاب:
أيوه عارف.
نور:
أنا أكبر منك.
