اسكريبت نور
الكاتبة زينب سعيد القاضي
الجزء الأول…..
قاعدة على مكتبها مندمجة الباب خبط ودخل زميلها.
شهاب:
السلام عليكم ورحمة الله وبركاته.
نور:
وعليكم السلام ورحمة الله وبركاته خير يا أستاذ شهاب في حاجة ؟!
شهاب:
خير إن شاء الله أنا كنت عايزة أتكلم معاكي في موضوع خاص.
نور:
موضوع خاص!!
شهاب:
أيوه مش هاخد من وقتك كتير ينفع أقعد ونتكلم؟!
نور:
أتفضل.
شهاب طيب قعد:
من غير لف ولا دوران أنا عايز أتجوزك.
نور سكتت لحظة، عينيها اتسعت شوية وبعدين رجعت لكرسيها تسند ضهرها، حاولت تحافظ على هدوءها رغم الارتباك اللي باين في ملامحها.
نور:
إيه؟! اللي حضرتك بتقوله ده يا أستاذ شهاب؟
شهاب كان واضح عليه التوتر، إيده بتتحرك من غير ما يحس، وصوته حاول يخليه ثابت:
زي ما سمعتي أنا عايز أتجوزك عارف إن الموضوع جه فجأة ويمكن يكون صادم بس أنا فكرت كتير قبل ما أجي وأتكلم.
نور بابتسامة:
طب خلينا نفهم إحنا زملاء شغل عمرنا ما خرجنا عن إطار الاحترام وفجأة حضرتك داخل تقول عايز تتجوزني؟
شهاب:
وده بالظبط اللي مخليني مطمن أنا شوفتك في الشغل في التعامل في أخلاقك في التزامك شوفتك وإنتِ تحت ضغط وإنتِ بتساعدي غيرك وإنتِ بتتحملي المسئولية كل ده خلاني أحترمك الأول وبعد كده ارتاحلك.
نور:
بس الارتياح لوحده مش كفاية للجواز.
شهاب:
معاكي حق ومش بقول إنه كفاية بس هو بداية أنا مش جاي ألعب ولا أضيع وقتك أنا داخل البيت من بابه ولو رفضتي هحترم ده جدًا بس ده في حالة إن رفضك ليه سبب منطقي أو عيب إنتِ شايفاه فيا.
نور سكتت شوية، قامت من على الكرسي وراحت ناحية الشباك، بصت برا كأنها بتجمع أفكارها شهاب كان متابعها بعينيه من غير ما يتكلم.
نور:
أنا متعودة أخد قراراتي بهدوء خصوصًا قرارات كبيرة زي دي ومش هينفع أقول آه أو لأ الوقتِ.
شهاب بلهفة:
مش مطلوب منك رد الوقتِ خالص خدي وقتك، فكري، اسألي براحتك واعرفي عني أكتر لو حابة أنا كل اللي طالبه فرصة.
نور لفت وبصتله:
فرصة لإيه بالظبط؟
شهاب:
فرصة إننا نتعرف في الإطار الصح لو وافقتي أكلم أهلك نتقابل رسمي وكل حاجة تبقى واضحة ولو حسيتِ إننا مش مناسبين ساعتها كل واحد يكمل طريقه باحترام.
نور رجعت قعدت قدامه:
