نوفيلا أقدار شيدت بالماضي
الكاتبة زينب سعيد القاضي
الفصل الخامس
«على حافة الهاوية »
مع آذان الفجر كان قد وصل راغب وشقيقه وبعض من رجال العائلة إلى القاهرة، وتحديدًا إلى المستشفى التي يرقد بها حسان، استعملوا عن حالته واستلموا جثمان الطفل بعد استخراج شهادة ميلاد له وتصريح بالدفن.
تهاوى راغب على مقعد حديدي واستند برأسه عليه بانكسار شديد فقد مات حفيده قبل أن يراه، وها هو نجله الوحيد يصارع الموت الآن، اقترب منه شقيقه وجلس جواره مربتًا على ظهره بأسف وقال:
-شد حيلك يا أخويا حقك عليا ابني السبب في ده كله.
أغمض راغب عينيه بتحسُر ورد:
-مقدر ومكتوب اللهم أجرني في مصيبتي واخلفني خيرًا منها.
تسأل الآخر باهتمام:
-هنرجع البلد ندفن الولد؟
أومأ بإيجاب:
-أيوه روح إنتَ والرجالة أدفنوه وأنا هفضل هنا مع ابني ولما تدفن العيل هات أم حسان وتعالى خليها تشوف ابنها يمكن تكون آخر مرة تشوفه.
رمقه شقيقه بعتاب وقال:
-لأ حول ولا قوة إلا بالله العلي العظيم متقولش كده استهدى بالله بإذن الله يقوم بالسلامة وتفرح بيه وبعوضه من تاني.
تنهد بمرارة واستطرد بإيضاح:
-مش سمعت كلام الدكتور قال إيه الحالة حرجة ابني خلاص بين ايد ربنا هربته عشان أحميه هو ومراته وابنه وفي النهاية مقدرتش أحميه المكتوب على الجبين لازم تشوفه العين.
سكت لحظة، وصوته بدأ يرتجف:
-كنت فاكر إنّي أقدر أغير القدر، إنّي أسبق الموت بخطوة، بس اتضح إن الموت دايمًا سبقنا بخطوتين. شُفت فيه ضنايا وهو بيودّع الدنيا، ومفيش في ايدي حاجة أعملها غير إني أقول الحمد لله على كل حال.
مد إيده لمسند الكرسي، وكأن الذكريات تقيلة عليه:
-أنا قلبي موجوع أوي اللي باقي لي من ريحته صوته في وداني، وضحكته اللي كانت تملأ البيت، الدنيا بعده بقت ساكتة قوي… ساكتة لدرجة توجع القلب هعمل إيه أنا وأمه من بعده؟ أنا اللي خليته يرجع البلد كان عايش هنا في القاهرة بعيد عن البلد واللي فيها أنا اللي رجعته بايدي وحكمت عليه يفضل فيها مكنتش أعرف إني هرجعه لقضاه.
طالعه شقيقه بإشفاق، لا يدري ما يقول له أو بماذا يواسيه.
اقترب بخطوات بطيئة، ومدّ يده لكتف أخيه، ثم سحبها سريعًا، كأن الوجع اللي شايفه قدامه بيمنعه حتى من اللمس.
قال بصوت خافت، متردد، كأنه خايف من كلماته:
