نوفيلا أقدار شيدت بالماضي

الفصل السادس «فرصة جديدة» جالسة فوق الفراش إلى جوار الصغير وهي شاردة فيما مضى…… كانت تقف في الشرفة تتأمل السماء وعينيه تلمع بالدموع، اقترب منها زوجها ووقف جوارها وتحدث بأسف: -حقك عليا متزعليش. أغمضت عينيها بتحسر وقالت: -مزعلش؟! إنتَ كدبت عليا وطلعت متجوز عليا؟ أجاب بلهفة: -أنا متجوزها هي الأول يا حبيبتي والله مش إنتِ. تبسمت باستخفاف وردت: -بجد؟ إنتَ كنت هتتجوزني أنا لولا أهلك رفضوا يعني كنت هتتجوزها عليا فعلاً لو كنا اتجوزنا وتقدر تقولي ليه مقولتش ليا من البداية انك اتجوزت هناك؟ أطلق زفيرًا حادٍ وقال: -عشان كنت عارف إنك هترفضى. طالعته باستنكار، وصاحت بانفعال: -بجد يعني جنابك خبيت عليا عشان تحطني قدام الأمر الواقع مش كفاية متجوزين في السر ولا كأننا عاملين عاملة؟ حاول تهدئتها بلطف: -ممكن تهدي أوعدك مش هتحسي إني متجوز غيرك أصلًا عشان أنا بحبك إنتِ وإنتِ بس اللي في قلبي يا حبيبتي وبعدين هي هناك في البلد مع أهلي مش هشوفها غير كل شهر غير يوم ولا يومين لكن هفضل معاكي هنا دائمًا أطمني. تبسمت ساخرة وقالت: -بجد؟! بالبساطة دي؟ إنتَ ليه بتعمل معايا كده؟ أنا كل ذنبي وغلطي الوحيد إني حبيتك وبس. اتسعت عين الآخر بصدمة، وتسأل بعدم استيعاب: -بجد؟ إنتِ شايفة إن حبك ليا غلطة؟ أنا عمري ما حبيت غيرك يا حنين عارف إني جيت عليكِ وظلمتك بس مش بإيدي والله العظيم مش بايدي بس ده أبويا مقدرش أقف قصاده وأقوله لأ سامحيني. اقتربت حنين منه خطوة، وصوتها يرتجف ما بين الغضب والوجع: دايمًا نفس الكلام... “مش بإيدي” و“غصب عني”! طب وأنا؟! أنا كان بإيدي أختار أحبك؟ كان بإيدي أختار أصدق كل وعد وكل كلمة؟ خفض عينيه، كأنه يخشى مواجهة نظرتها، وقال بصوت مبحوح: -أنا مكنتش عايز أوصلنا لكده، والله العظيم كنت بحلم إننا نكمّل سوا، بس الظروف كانت أقوى منّي. ضحكت حنين بسخرية مرة، وقالت: -الظروف؟ ولا ضعفك؟! لأنك لو كنت بتحبني بجد كنت حاربت علشاني، كنت واجهت أبوك، كنت اختارتني... مش استسلمت وسكتّ. رفع رأسه ببطء، وعينيه ممتلئتين بندم صادق: -يمكن عندك حق... يمكن أنا ضعفت. بس والله يا حنين كل يوم من غيرك كان عِقاب، كل لحظة كنت فيها بعيد عنك كانت بتقت/لني. سكت لحظة، ثم تابع بصوت خافت: -لسه بحبك... ولسه شايف إنك الوحيدة اللي تستاهل أبدأ من جديد علشانها. ترددت حنين، ونظرت إليه طويلًا، تتصارع داخلها الرغبة في التصديق مع خوفها من التكرار، ثم همست: -الحب لوحده عمره ما يكفي ... المرة دي لو رجعت، لازم تكون مستعد تواجه، مش تستخبى ورا الظروف تاني ونتجوز في السر زي الحرامية. أخذ نفس عميق وقال: -أوعدك إن هصلح كل حاجة ومش هظلمك ولا هظلمها ربنا يقدرني أعدل ما بينكم. تبسمت ساخرة وقالت: -وتفكر لو أنا رضيت بالأمر الواقع وإني زوجة تانية هي هتوافق؟ طيب لو خيرتك ما بيني وبينها لو طلبت منك تطلقني هتعمل إيه وقتها؟ هتختار مين ؟ صمت قليلًا لا يدرك بما يجيبها هو لم يفكر في هذا الأمر من قبل، تبسمت هي بسخرية وردت: -سكت ليه يا ترى معندكش إجابة؟ ولا عندك إجابة ومش حابب تجاوب؟ على العموم هرفع عنك أنا الحرج وأجاوب أنا هتختارها هي عشان هي اللي في العلن واختيار أهلك وهي ليها أهل وسند لكن أنا مليش حد مع الأسف محدش هيخسر غيري أنا وبس. أجابها بلهفة: -أوعدك عمرك ما هتندمي على زواجك مني ثقي فيا وبس. تنهدت بأسى وقالت: -مقدميش غير أني أثق فيك… تبسم براحة وقال: -أوعدك يا حبيبتي إني هكون قد الثقة دي. فاقت من شرودها ومسحت دموعها التي سالت دون وعي منها، ابتسمت بمرارة وهتفت بانكسار: -مع الأسف مكنتش قد الثقة وأنا اللي خسرت وأنا اللي هفضل طول عمري ندمانة لله الأمر من قبل ومن بعد. ٭٭٭٭٭ مساءً ذهبت سامية لزيارة حنين كي تطمئن عليها، وأخبرتها لما حدث اليوم، كانت تستمع لها حنين بانصات شديد، وفور أن أنهت الأخرى حديثها، تسألت بلهفة: -يعني إنتِ مقولتيش ليهم؟ حركت رأسها بإيجاب وقالت: -أيوه خفت اتكلم الوقتِ وأحكي ليهم وياخدوا الولد والناس دول يؤذوا الولد. قطبت جبينها بحيرة وتسألت: -يعني الولد هيفضل معايا على طول؟ حركت رأسها نافية وهتفت بإيضاح: -لأ مؤقت بس أنا مستنية أعرف حالة والد الطفل هتتحسن ويفوق ولا لأ لو فاق هعرفه بإذن الله لو ربنا استرد امانته مش هيبقى قدامي غير حل واحد أني أعرف والده ونسلمه الطفل. غام الحزن في عين الأخرى مما جعل سامية تهتف بحنان: -إحنا متفقين من الأول يا بنتي بلاش تعلقي نفسك به. تنهدت حنين بقلة حيلة وقالت: -لله الأمر من قبل مش بإيدي معلقش نفسي به بس اطمني هيرجع لأهله بإذن الله. تبسمت سامية بارتياح، واستطردت مستفهمة: -البيت ناقصه حاجة أنزل أجبها أو الولد محتاج حاجة؟ حركت رأسها نافية: -لأ الحمد لله. فتحت سامية حقيبتها وأخرجت عدة أوراق مالية ومدت يدها بها إلى حنين التي رمقتها بعتاب وقالت: -عيب كده إنتِ كده بتشتميني على فكرة. هتفت سامية بلهفة: -مش قصدي والله يا حبيبتي بس الولد مصاريفه كتير وإنتِ ملكيش ذنب. ردت حنين بهدوء: -مصاريفه مش كتير ولا حاجة وبعدين إنتِ مضربتنيش على ايدى عشان أوافق، وبعدين اطمني مستورة الحمد لله. هتفت سامية بإصرار: -ربنا يزيد ويبارك يا حبيبتي بس عشان خاطري خدي دول . حركت حنين رأسها نافية وقالت: -لأ مش هاخد حاجة ولو عملتي كده تاني هزعل منك. تنهدت بقلة حيلة ووضعت النقود في حقيبتها مرة أخرى، وغمغمت محذرة: -ماشي هسمع كلامك بس لو احتاجتي فلوس ولا أي حاجة قوليلي اتفاقنا؟ أومأت بايجاب: -اتفاقنا. نهضت سامية مستأذنة: -طيب هقوم أمشي أنا محتاجة حاجة يا حبيبتي؟ ردت ممتنة: -سلامتك يا حبيبتي منحرمش منك في رعاية الله. تحركت حنين برفقتها أوصلتها إلى الخارج وأغلقت الباب خلفها، واستندت بظهرها على الباب وتنهدت بألم: -الصبر من عندك يا رب العالمين. ٭٭٭٭٭ مرت شهرًا كاملاً لا يزال الطفل برفقة حنين وسامية وعفاف يذهبون لزيارتها باستمرار، أما عن حالة والد الطفل لا يزال كما هو في غيبوبة، وظل والده ووالدته جواره في المستشفى أملًا منهم في الله أن يثلج قلبهم وأن يفيق نجلهم مرة أخرى… ويعود إلى الحياة من جديد.. ٭٭٭٭٭ في الصعيد وتحديدًا في قصر عائلة البنهاوي، كان يجلس كبيرهم منكس الرأس حزنًا، دلف ابنه الأكبر عليه وجده هكذا جلس في مواجهته متمتمًا باستياء: -وبعدين يا حج هتفضل قاعد تبكي عليها العمر كله ولا إيه؟ رفع رأسه ونظر إلى نجله باستياء وهتف بحدة: -أيوه هزعل عليها العمر كله وأحمد ربنا إني ماخدتش تار حفيدتي وابنها منك إنتَ وابنك. اتسعت عيناه بصدمة وتسأل: -نعم؟! تاخد تارك مني أنا وابني؟ هي حصلت يا حج ؟ أجابه ببرود: -أيوه حصلت زي ما إنتَ ابني أبوها الله يرحمه كان ابني وزي ما ابنك حفيدي هي حفيدتي اللي فاضلة ليا من ريحة أبوها وابنك ق/تلها بدم بارد هي واللي في بطنها. صاح الأخر بدفاع واهي: -ابني مغلطش ابني أخد تارة ابنه. رمقه والده شذرًا وقال: -وتار حفيدك مكنش عند حسان وأنا وإنتَ عارفين كويس إنتَ قاصد تق/تل حسان وبنت أخوك عشان ورثها من أبوها فضربت عصفورين بحجر واحد. تهرب من النظر إلى والده ونظر إلى الجهة الأخرى وقال: -إيه اللي حضرتك بتقوله ده بس يا حج بقى أنا هفكر أقت/ل بنت أخويا بردو دي بنتي بس حظها بقى كانت مع زوجها وحصل اللي حصل. تهكم والده ساخرًا: -ابنك كان شايفها مع زوجها يعني لو مش قاصد يق/تل بنت عمه فعلاً كان وقف كل حاجة عشان بنت عمه. هتف بدفاع: -نصيبها كده وبعدين هي اللي اختارت تبقى مع زوجها وتخسر أهلها يبقى تشرب بقى . رمقه والده شذرًا واستطرد بإيضاح: -لأ تصدق غلطانة كان المفروض تسيب جوزها وأهله اللي صنوها كأنها بنت من بناتهم وترجع هنا تاني عشان تفضل في الذل ده طول عمرها صح؟ ده اللي إنت َ كنت عايزه؟ على العموم نصيب حفيدتي من الورث هيروح كله لله. انتفض الآخر من مكانه بصدمة وتساءل بعدم استيعاب: – نعم؟ انهي نصيب حفيدتك من الورث؟ وهيروح لمين إن شاء الله ؟ هروح لله إزاي يعني؟! إنتَ بتهزر أكيد استحالة تكون بتتكلم جد يا حج؟! اقترب منه بخطوات متوترة، وعيناه متسعتان بعدم تصديق، بينما هو كان جالس بثبات، ملامحه جامدة كأنه اتخذ القرار منذ زمان. قال بهدوء حاسم: – زي ما سمعت. الورث ده خلاص مبقاش له لازمة طالما هي ماتت يبقى الصح كله لله على روحها، صدقة جارية على روحها وروح أبوها وأمها وابنها… يمكن تكون دي الطريقة الوحيدة اللي ترتاح بيها روحها، وأكون قدرت أخد حقها منكم رغم أن مش ده حقها بس. رفع صوته بانفعال: – إنتَ بتتكلم جد؟ دي فلوسي وتعبي سنين حضرتك عايز تضيعه على الأرض؟! لأ طبعًا على ج/ثتي إن حصل. نظرت له بنظرة حزينة لكنها قاطعة وقالت: – تعب السنين اللي بتتكلم عنه جنابك ده فلوسي وحقك كنت بتاخده أول بأول، لكن الغلبانة دي من يوم ما جت على الدنيا وحقها مهدور، وفي الآخر ماتت على إيدك إنتَ وابنك ومن يوم ما هي ماتت ما بقاش في غير وجع وحزن لقلبي، والوجع ده خلاص لازم يتحول لرحمة لازم أريحها في قبرها قبل ما ربنا يسترد أمانته. طالع والده بحدة وصاح بانفعال: -مش هيحصل يا أبوي مش هيحصل على ج/ثتي إن حصل. أنهى كلماته وغادر سريعًا المكان، بينما والده يتابعه بنظرات متحسرة على قلب أعماه المال…. ٭٭٭٭٭ في شقة حنين، كانت تقف في الشرفة وهي تحمل الرضيع بين يديها تداعبه تارة وتقبله تارة أخرى وهي تدندن إليه، ما أن أنهت كلمات الأغنية حتى ضمته بحنان وقبلت جبهته وهي تحدثه بحنان: -حبيب قلب وعقل وروح ماما، تعرف يا سند إنتَ نور حياتي وفرحة قلبي وخليت ليها معنى، كل ما أفتكر إن هيجي يوم تبعد عني فيه قلبي يوجعني أوي ياريت تفضل معايا يا حبيبي طول العمر وتكون عوض ليا وسندي في الدنيا. طالعت الطفل وجدته قد غفر في ثبات عميق، قبلته بحنان وتحركت إلى الداخل ووضعته فوق الفراش بحرص شديد، ودثرته جيدًا، وجلست جواره تتأمله بحنان. يُتبع….

نوفيلا أقدار شيدت بالماضي

الكاتبة زينب سعيد القاضي

اترك تعليقاً إلغاء الرد

مقالات ذات صلة

اجمد كده يا ابو كمال

لم_يكن_فتي_أحلامي

حركة ايه معلش

مين الولد الصغير ده؟

نوفيلا أقدار شيدت بالماضي

ما هي الدولة العربية التي قال عنها رسول الله صلى الله عليه وسلم هم أرق أفئدة وألين قلوباً ووصفهم بأهل الإيمان والحكمة

اترك تعليقاً إلغاء الرد