نوفيلا أقدار شيدت بالماضي
بقلم الكاتبة زينب سعيد القاضي
رد ببرود:
-زوجها بيخلص في المستشفى والولد مات ومحجوز هناك أهل أبوه يستلموه وأنا هروح بنفسي أبلغهم.
تبسم والده بفخر وقال:
-زين يا ابني راجل من ضهر راجل أنا جاي وياك يلا بينا.
تحرك هو ونجله وخلفهم الرجال، بينما ظل الكهل يجلس جثمان حفيدته بتحسر:
-الله يرحمك يا بنتي الله يرحمك ويرحمنا من بعدك القيامة هتقوم والنار هتولع ومش هتطفي غير ببحور الدم لله الأمر من قبل ومن بعد.
٭٭٭٭٭
وصلت سامية إلى العقار الذي تقطن به حنين بعد أن أنهت دوامها، وقفت أمام باب الشقة المدون على الورقة التي بحوزتها ودقت الباب بخفة.
بينما في الداخل كانت تتمد جوار الصغير الغافي بعد أن غادرت تلك الملاك التي كانت بمثابة هدية من القدر لها، استمعت إلى دق على باب الشقة نهضت بضعف شديد، ووضعت الحجاب فوق رأسها واتجهت إلى الباب وفتحته وجدت سامية أمامها.
تبسمت الأخرى وهتفت معتذرة:
-شكلي قومتك حقك عليا يا حبيبتي.
ردت بوهن:
-لأ ولا يهمك تشرفي في أي وقت طمنيني ابني اندفن؟
تنهدت الأخرى بأسف وقالت:
-لأ هما استلموا والدة الطفل بس وابنك أهل الأب هما اللي هيجوا يستلموه.
أغمضت عينيها بتحسر وقالت:
-أه يا قلبي عليك يا ابني غصب عني.
ربتت الأخرى على ظهرها بحنان وغمغمت قائلة:
-كله خير يا بنتي.
تنحت حنين جانبًا مفسحة لها المجال كي تدلف إلى الداخل:
-اتفضلي.
دلفت الأخرى برفقتها وأغلقوا باب الشقة خلفهم، جلسوا سويًا على الأريكة وهتفت حنين بانكسار:
-كده حرام.
قطبت سامية جبينها بحيرة وتسألت باهتمام:
-هو إيه اللي حرام؟
أجابتها بانكسار:
-ابني هينكتب باسم ناس تانيين وده حرام.
تنهدت سامية عبو بأسف وقالت:
-والله ما عارفة أقولك أيه طيب إنتِ تعرفي تتواصلي مع طليقك؟ يجي يسجله ويطلع تصريح الدفن؟
حركت رأسها نافية وهتفت بأسى:
-مع الأسف معرفش حاجة عنه ولا حتى أعرف هو منين بالظبط في الصعيد.
ضربت سامية كف بكف واستطردت بإبانة:
-طيب كده مقدمناش حل يا بنتي الولد ده قبل ما يتدفن محتاج تصريح وده مش هيطلع من غير شهادة ميلاد ودي محتاجة أهل الأب العصب ربنا يسامحنا بإذن الله المهم طمنيني عنك إنتِ بخير؟
أومأت بايجاب:
-الحمد لله.
رددت الأخرى:
