نوفيلا أقدار شيدت بالماضي
الكاتبة زينب سعيد القاضي
تنهد الطبيب بأسف ورد:
-البقاء لله ربنا استرد امانته.
أغمض عينيه بتحسر وتمتم بمرارة:
-إنا لله وإنا إليه راجعون.
ربت الطبيب على كتفه بحنان وقال:
-استهدى بالله كلنا أموات ولاد أموات أنا هروح أبلغ أهلك إنك فوقت بقالهم شهر كامل رافضين يمشوا ويسبوك.
قطب جبينه بحيرة وتسأل بعد فهم:
-شهر كامل؟
أومأ الطبيب بإيجاب:
-أيوه إنتَ في غيبوبة من شهر مش بقولك أكتب ليك عمر جديد حالتك كانت منتهية بس سبحان الله العظيم يحيي العظام وهي رميم.
تحرك الطبيب وخلفه الممرضة، وثوان ودلف والديه بلهفة لا يكادوا يصدقوا أن نجلهم قد عاد إلى الحياة من جديد، والدته كانت الأسرع في الوصول إليه ما أن رأته ضمته بلهفة أم وهي تقبل رأسه بحنان واشتياق، لا تصدق ما تراه، قد عاد إليها نجلها من موت محتوم:
-يا قلب أمك حمد الله على السلامة يا حبيبي.
اقترب والده منه وعينيه تفيض من الدمع وهو يردد:
-حمد الله على السلامة يا ابني حمد الله على سلامتك النهاردة بس ردة فيا الروح برجوعك ليا بالسلامة.
رد بإرهاق:
-الله يسلمك يا بابا قتلوا مراتي وابني؟ قتلوهم يا بابا؟
تطلع والده إلى الأرض بأسى وقال:
-ربنا يرحمهم يا ابني وربنا يعوض عليك أنا السبب في ده كله أنا اللي رجعتك البلد وجوزتك بنت البنهاوي وخليتك تسيب شغلك وحياتك هنا لو كنت أعرف مكنتش رجعتك لقضاك.
هتف بوهن:
-ده مقدر ومكتوب يا بابا ده قضايا الحمد لله أنا راضي باللي ربنا كتبه أدفنت هي والولد؟
أومأ بايجاب:
-الولد بس لكن هما أخدوها تندفن عندهم متقلقش يا ابني أنا هاخد تارهم بنفسي أنا اللي كان موقفني إني اطمئن عليك.
هتف باصرار:
-لأ حقي هيبقى بالقانون كفاية بقى تار ودم وأرواح بريئة تموت من غير ذنب.
تنهد بقلة حيلة وقال:
-لله الأمر من قبل ومن بعد اللي تشوفه يا حبيبي المهم عند إنك قومت بالسلامة أنا هكلم عمك يدبح عجل ويوزعه على الغلابة ولا أقولك خليهم عجلين خلي الغلابة تأكل.
طالعهم بوهن وقال:
-مش اطمنتوا عليا؟ روحوا ارتاحوا الدكتور قال بقالكم شهر هنا.
ردت والدته بلهفة:
-مش همشي من هنا غير وأنا رجلي على رجلك يا ضنايا.
أكد والده على حديثها:
-زي ما أمك قالت مش هنتحرك من هنا غير بيك.
