رواية أقدار شيدت بالماضي
بقلم الكاتبة زينب سعيد القاضي
-طلقت المصراوية؟
أجاب بانكسار:
-أيوه يا أبوي طلقتها.
تبسم والده بزهو وقال:
-كويس كده تبقى ابني بحق وصحيح.
رفع رأسه ورمق والده بعتاب وتسأل:
-ذنبها إيه أطلقها يا أبوي قولي غلطة واحدة عملتها؟
أجاب ببرود:
-مصراوية وكمان أبوها وأمها ميتين وعايشة لوحدها يعني أكيد ماشية على حل شعرها.
صاح الآخر بانفعال:
-لأ يا بابا مراتي كانت أشرف من الشرف، ومتربية أحسن تربية.
تبسم والده باستهزاء وقال:
-أه ما هو واضح التربية اللي خلتك بتعلي صوتك على أبوك يا محترم.
أخفض رأسه باحترام، واستطرد بإيضاح:
-لأ عشت ولا كنت لما أغلط في حضرتك أو أعلي صوتي على حضرتك بس ربنا ما مش بيرضى بالظلم.
ضرب والده بعصاه أرضًا بقوة، وصاح بانفعال:
-قصدك إني ظالم؟!
أجاب بلهفة:
-مش قصدي يا بابا بس أنا بدافع على مراتي اللي مشوفتش منها خير كل خير.
رد والده بغلظة:
-قصدك اللي كانت مراتك يا ولد أبوك، مراتك فوق في أوضتك لكن المصراوية خلاص مبقتش مراتك خلاص، أطلع شوف مراتك وراضيها ومن هنا ورايح مفيش نزول مصر خالص.
اتسعت عين الآخر بصدمة، وتسأل بعدم استيعاب:
-هتحبسني يا أبوي ؟
رد بنفاذ صبر:
-لأ مش بحبسك بس خايف تحن ليها وتروح تردها من ورايا.
تبسم بمرارة وقال:
-اطمئن حتى لو أنا عايز كده هي مش هتوافق آخر حاجة ممكن تتمنى تشوفها في حياتها حاليًا هي وشي بعد اللي عملته فيها.
تهكم والده بسخرية:
-والله؟ ليه عملت فيها إيه؟ مش كفاية العز اللي كانت عايشة فيه. ولا المؤخر اللي أخدته يعيشها ملكة.
ارتسمت على شفتيه ابتسامة باهتة واسترسل بإبانة:
-رفضت تاخد المؤخر يا بابا مش عايزة حاجة مني.
تنحى الآخر جانبًا وهتف بأمر:
-أدخل يلا وروح راضي مراتك وأنسى المصراوية دي خلاص اعتبرها ماتت ودفنت سامع؟
رد بأسى:
-سامع.
٭٭٭٭٭
كانت تجلس فوق الفراش تطلع أمامها بشرود، فتح الباب ودلف زوجها، وأغلق الباب خلفه، وتحرك تجاه الفراش وجلس في مقابلتها وتحدث بهدوء:
-عاملة إيه؟
أجابت بهدوء:
-الحمد لله.
هتف بتردد:
-إنتِ كويسة؟
أومأت بتأكيد:
-قولتلك أيوه الحمد لله.
أطلق زفيرًا حادٍ بثقل، واسترسل حديثه بجدية:
-أنا خلاص طلقتها أنا عارف إنك مصدومة وزعلانة وده حقك بس أنا كنت أعرفها من زمان وكنت عايز اتجوزها من قبل ما أعرفك من الأساس.
